(តាកែវ) ៖ នៅថ្ងៃទី២៣ ខែវិច្ឆិកា ឆ្នាំ២០២៤ ដោយបានការអនុញ្ញាតពី លោកវរសេនីយ៍ទោ សុខ ដារ៉ា មេបញ្ជាការស្ដីទីកងរាជអាវុធហត្ថខេត្តតាកែវ និងមានការសម្របសម្រួលនីតិវិធីពី ឯកឧត្ដម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ និងលោក ប្លង់ សុផល ព្រះរាជអាជ្ញារងអមសាលាដំបូងរាជធានីភ្នំពេញ ។
កម្លាំងជំនាញកងរាជអាវុធហត្ថខេត្តតាកែវ ដឹកនាំដោយលោកវរសេនីយ៍ឯក កែន វណ្ណៈ មេបញ្ជាការរងទទួលការងារនគរបាលយុត្តិធម៌ បានពន្លាតដែនសមត្ថកិច្ចទៅរាជធានីភ្នំពេញ ដោយបានសហការជាមួយកម្លាំងជំនាញកងរាជអាវុធហត្ថលើផ្ទៃប្រទេស និងកម្លាំងជំនាញកងរាជអាវុធហត្ថរាជធានីភ្នំពេញ ដើម្បីបង្រ្កាបករណីគ្រឿងញៀនខុសច្បាប់ ទទួលបានលទ្ធផលដូចខាងក្រោម៖
* វេលាម៉ោង ១៤៖៥៥នាទី ថ្ងៃទី២១ ខែវិច្ឆិកា ឆ្នាំ២០២៤ នៅចំណុចបង្គោលគីឡូម៉ែត្រលេខ២០ លើផ្លូវជាតិលេខ៣ សង្កាត់ពងទឹក ខណ្ឌដង្កោ រាជធានីភ្នំពេញ ។
* ឃាត់ខ្លួនជនសង្ស័យ បានចំនួន ១នាក់ ឈ្មោះ គង់ ណារ៉ា ហៅ ញ៉ាញ់ ភេទប្រុស អាយុ ១៦ឆ្នាំ ជាអ្នកដឹកជញ្ជូន រក្សាទុក ជួញដូរគ្រឿងញៀន (មិនចេះប្រើប្រាស់) ។
ដកហូតវត្ថុតាង រួមមាន ៖ ម្សៅក្រាមពណ៌សថ្លា ចំនួន ១កញ្ចប់ធំ ទម្ងន់ ១០១.៥៦ក្រាម ថ្លឹងទាំងសំបកថង់ (សង្ស័យជាសារធាតុញៀន), ទូរសព្ទដៃ ចំនួន ១គ្រឿង ម៉ាក iPhone 11 Pro Max, ម៉ូតូចំនួន ១គ្រឿង ម៉ាក C125 ពណ៌ខ្មៅ ពាក់ផ្លាកលេខ ភ្នំពេញ 1KP-7714 ។
* នៅវេលាម៉ោង ១៧៖០០នាទី ថ្ងៃខែឆ្នាំដដែល តាមចម្លើយសារភាពរបស់ជនសង្ស័យខាងលើ កម្លាំងជំនាញ បាននាំមកចង្អុលបង្ហាញផ្ទះជួល លេខ៣៦E1 ផ្លូវ រថភ្លើង ក្រុម៣៩ ភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ ។
កម្លាំងជំនាញ បានធ្វើការឆែកឆេរ ដោយមានការចូលរួមពី លោកមេភូមិ លោកស្រីចៅសង្កាត់ រកឃើញវត្ថុតាងបន្ថែម រួមមាន ៖ ប័ណ្ណចាក់វ៉ាក់សាំង ចំនួន ២សន្លឹក, ប័ណ្ណ ប.ស.ស ចំនួន ២សន្លឹក, សំបុត្របញ្ជាក់កំណើត ១សន្លឹក, សម្ភារ:វេចខ្ចប់គ្រឿងញៀនមួយចំនួន, លោហ:ធាតុពណ៍លឿងមានដាំត្បូង ពណ៌ស ក្រហម ខៀវ មួយចំនួន (មានក្នុងរូបភាព) ។
ជនសង្ស័យជាម្ចាស់ទីតាំងឈ្មោះ គង់ សុភា ភេទប្រុស អាយុ ១៩ឆ្នាំ ត្រូវជាបងបង្កើតរបស់ជនសង្ស័យដែលឃាត់ខ្លួនខាងលើ (បានរត់គេចខ្លួន) ។
បច្ចុប្បន្ន ជនសង្ស័យ រួមទាំងវត្ថុតាង កម្លាំងជំនាញបាននាំមកទីបញ្ជាការកងរាជអាវុធហត្ថខេត្តតាកែវ ដើម្បីកសាងសុំណុំរឿងបញ្ជូនទៅអយ្យការអមសាលាដំបូងខេត្តតាកែវ ដើម្បីចាត់ការតាមនីតិវិធីច្បាប់ ៕
