(បាត់ដំបង) ៖ នៅថ្ងៃទី៤ ខែធ្នូ ឆ្នាំ២០២៣ វេលា ម៉ោង ១៤ ៖ ០០ នាទី នៅចំណុចដំណាក់ដង្កោ ក្នុងភូមិថ្មី ឃុំកន្ទឺ១ ស្រុកបាណន់ ខេត្តបាត់ដំបង ដោយអនុវត្តតាមបទបញ្ជារបស់លោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង និងលោកឧត្តមសេនីយ៍ត្រី លឹម ពុទ្ធីឡា ស្នងការរង ផែនការងារនគរបាលព្រហ្មទណ្ឌ លោក ស្រេង សុខា អភិបាល នៃគណ: អភិបាលស្រុកបាណន់ និងមានការសម្របសម្រួលលើនីតិវិធីពី ឯកឧត្តម កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង កម្លាំងការិយាល័យនគរបាលព្រហ្មទណ្ឌកម្រិតធ្ងន់ លោកវរសេនីយ៍ឯក ផង់ សុភាព ជាស្នងការរង ទទួលដឹកនាំ និងលោកវរសេនីយ៍ឯក កោ ស៊ុនកាំង ជានាយការិយាល័យ លោកនាយរងការិយាល័យ និងមន្រ្តីពាក់ព័ន្ធរួមគ្នា ជាមួយកម្លាំងអធិការដ្ឋាននគរបាលស្រុកបាណន់ លោកវរសេនីយ៍ទោ សំ វីរៈ ជាអធិការ និងកម្លាំងប៉ុស្តិ៍នគរបាលរដ្ឋបាលកន្ទឺ១ បានចុះប្រតិបត្តិការស្រាវជ្រាវ និងបង្ក្រាបករណីឃាតកម្ម (ប្រើដំបង និងពូថៅ) ០១ ករណី ។
សមត្ថិកិច្ច បានធ្វើការនាំខ្លួនជនសង្ស័យ ០១ នាក់ មកកាន់អធិការដ្ឋាននគរបាលស្រុកបាណន់ គឺឈ្មោះ ឌឿន ចន្ត្រា ហៅត្រា ភេទប្រុស អាយុ ៤០ ឆ្នាំ មានទីលំនៅភូមិអូស្រឡៅ ឃុំវត្តតាមិម ស្រុកសង្កែ ខេត្តបាត់ដំបង មកស្នាក់នៅធ្វើស្រែនៅចំណុចដំណាក់ដង្កោ ភូមិថ្មី ឃុំកន្ទឺ១ ស្រុកបាណន់ ខេត្តបាត់ដំបង នាំមកធ្វើការសាកសួរនៅអធិការដ្ឋាននគរបាលស្រុក ។
សូមជម្រាបជូនថា មូលហេតុដែលឈានដល់ការឃាត់ខ្លួននេះ គឺកាលពីថ្ងៃទី៣ ខែធ្នូ ឆ្នាំ២០២៣ មានការភ្ញាក់ផ្អើលមួយដោយសារប្រទះឃើញសាកសពជនរងគ្រោះឈ្មោះ សួន ហ៊ីង ភេទប្រុស អាយុ ៤៣ ឆ្នាំ រស់នៅភូមិឆាយរំពាត់ ឃុំកន្ទឺ២ ស្រុកបាណន់ ខេត្តបាត់ដំបង ស្លាប់នៅក្នុងគុម្ពោតព្រៃ ស្ថិតនៅវាលស្រែ ភូមិថ្មី ឃុំកន្ទឺ១ ស្រុកបាណន់ ខណៈដែលក្រុមគ្រួសារបស់សពបានប្តឹងមកសមត្ថកិច្ចនគរបាលស្រុក ឱ្យជួយស្វែងរក ត្បិតជនរងគ្រោះខាងលើបានចេញពីផ្ទះថាទៅបូមទឹកដាក់ស្រែតាំងពីយប់ថ្ងៃទី៣០ ខែវិច្ឆិកា ឆ្នាំ២០២៣ ហើយបាត់ដំណឹងសូន្យឈឹងរហូតមក ។
តាមលទ្ធផលនៃការពិនិត្យកន្លែងកើតហេតុ និងលើសាកសព សមត្ថកិច្ចសន្និដ្ឋានថា ជនរងគ្រោះបានស្លាប់ដោយករណីឃាតកម្ម ទើបផ្ដើមធ្វើការស្រាវជ្រាវស៊ើបអង្កេតលើករណីនេះ រហូតដល់កំណត់អត្តសញ្ញាណជនដៃដល់ និងឈានដល់ការឃាត់ខ្លួនតែម្តង ។
សមត្ថកិច្ចដកហូតរួមមាន៖
– ពូថៅ ចំនួន ០១ ដើម
– ដំបង ចំនួន ០១ ដើម
– ពិលពាក់ក្បាល ចំនួន ០១ និងខោជើងវែងពណ៌ខ្មៅ (ស្លៀកពេលធ្វើសកម្មភាព) ចំនួន ០១ ។
នៅចំពោះមុខសមត្ថកិច្ច ជនដៃដល់រូបនេះបានឆ្លើយសារភាពថា រូបគេពិតជាបានវាយ និងកាប់ជនរងគ្រោះឈ្មោះ សួន ហ៊ីង រហូតដល់ស្លាប់នៅចំណុចកើតហេតុខាងលើ ហើយយកសាកសពទៅទម្លាក់ចោល នៅក្នុងគុម្ពោតព្រៃជិតនោះប្រាកដមែន កាលពីយប់ថ្ងៃទី៣០ ខែវិច្ឆិកា ឆ្នាំ២០២៣ រីឯមូលហេតុដែលនាំទៅដល់ការកាប់សម្លាប់បែបនេះ គឺដោយសារខឹងជនរងគ្រោះតែងតែមកឆក់ត្រីនៅក្នុងប្រឡាយខាងក្រោយផ្ទះរបស់ខ្លួនកន្លងមក ។
បច្ចុប្បន្ន សមត្ថកិច្ចកំពុងរៀបចំសំណុំរឿងបញ្ជូនមកផែនជំនាញ ដើម្បីអនុវត្តបន្តតាមនីតិវិធី ៕
