(ខេត្តកែប)៖ ប្រជាពលរដ្ឋចំនួន០៣គ្រួសារ ស្ថិតក្នុងភូមិអន្ទង់ស ឃុំពងទឹក ស្រុកដំណាក់ចង្អើរ ដែលត្រូវខ្យល់កន្ទ្រាក់បំផ្លាញផ្ទះសំបែង ត្រូវបានសាខាកាកបាទក្រហមកម្ពុជាខេត្តកែប នាំយកអំណោយសង្គ្រោះរបស់ សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ទៅផ្តល់ជូន នៅរសៀលថ្ងៃសក្រ ១២កេីត ខែជេស្ន ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៤ ខែមិថុនា ឆ្នាំ២០១៩ ដែលដឹកនាំដោយ លោក កែន សត្ថា អភិបាល នៃគណៈអភិបាលខេត្ត និងជាប្រធានគណ:កម្មាធិការសាខាកាកបាទក្រហមខេត្ត អមដំណេីរដោយ អនុសាខាកាកបាទក្រហមស្រុកដំណាក៎ចង្អើរ និងសហការី។
យោងតាមរបាយការណ៍របស់សាខាកាកបាទក្រហមកម្ពុជាខេត្តកែប បានឲ្យដឹងថា ប្រជាពលរដ្ឋដែលទទួលរងគ្រោះដោយខ្យល់ព្យុះ និងខ្យល់កន្ត្រាក់មានចំនួន ០៣គ្រួសារ ក្នុងនោះរងគ្រោះធ្ងន់ធ្ងរចំនួន ០១គ្រួសារ រងគ្រោះមធ្យម ០១គ្រួសារ និងរងគ្រោះស្រាល ០១គ្រួសារ ស្ថិតនៅភូមិអន្ទុងស ឃុំពងទឹក ស្រុកដំណាក់ចង្អើរ ខេត្តកែប។
ឆ្លៀតក្នុងឱកាសក្នុងដែរ លោក កែន សត្ថា ប្រធានសាខា ក៏បានភ្ជាប់មកជាមួយនូវ សង្កសី ចំនួន ៥០សន្លឹក , ថវិកា៥០មឺុនរៀលជូនដល់គ្រួសាររងគ្រោះធ្ងន់ធ្ងរ , ២០មឺុនរៀល ជូនគ្រួសាររងគ្រោះមធ្យម និង ១០មឺុនរៀលសម្រាប់គ្រួសាររងគ្រោះស្រាល សម្រាប់ជួសជុលផ្ទះសំបែងឡើងវិញ និងបានផ្តល់ថវិកាចំនួន ៤០មឺនរៀលជូនដល់កុមារី ០២នាក់សម្រាប់ទិញកង់ជិះទៅសាលារៀន ព្រមទាំងបានជូនថវិការមួយចំនួនដល់ប្រជាជនក្រីក្រក្នុងមូលដ្ឋានផងដែរ៕
